Skulpturewee
D’Konscht am Häerz vun eisen Dierfer
Zënter 2008 organiséiert d’Gemeng Stengefort, an Zesummenaarbecht mat Aktikulti a.s.b.l. reegelméisseg e Concours fir Skulpturen. D’Zil: déi zäitgenëssesch Konscht am Häerz vun den Dierfer vun der Gemeng ze placéieren, an engem Rhythmus vun zwee Joer.
All Editioun follegt deem selwechte Prinzip: en Opruff u Kënschtler·inne gëtt lancéiert, d’Projeten, déi erakommen, ginn der Ëffentlechkeet virgestallt, da wielt e Jury d’Gewënnerwierk. De/d‘Kënschtler·in realiséiert dann seng Skulptur an Echtgréisst, déi dann dee kënschtleresche Patrimoine am Fräie vun der Gemeng beräichert.
Am Laf vun den Editiounen ass esou de Skulpturewee entstanen, Skulptur no Skulptur, fir haut e richtege kënschtleresche Parcours duerch Stengefort, Klengbetten, Hoen a Grass ze bilden.
D’Skulpture vum Parcours
| Skulptur | Kënschtler | Inauguratioun | Standuert |
|---|---|---|---|
| Stengeforter Héichuewen | Lukas Arons, Peder Istad | 2008 | Rousegäertchen, Square Patton, Stengefort |
| Décalage | Philippe Gourier | 2010 | Weier, Stengefort |
| Loftballon | Hélène Dom | 2013 | Cité op der Barriär, Hoen |
| De Mënsch, l'être humain | Yvette Gastauer-Claire | 2016 | Rue de Hobscheid - Cité de l'Usine, Stengefort |
| EPI | Paul Mathey | 2019 | Plaz, Rue de la Gare, Klengbetten |
| GrenzGras(s) | Claude Gérard | 2024 | Weier, ZARO, Grass |
| Transformation | Markus Hoffmann | 2026 | Mirador «Op der Berk», Stengefort |
Fannt de ganze Plang vum Skulpturewee fir erofzelueden hei.
Den 30. September 2026 huet d’Gemeng Stengefort zesumme mat AKTIKULTI d’Skulptur „Transformation“ vum däitsche Kënschtler Markus Hoffmann um Mirador „Op der Berk“ ageweit. Dës nei Skulptur, déi aus dem Skulptureconcours ervirgaangen ass, ergänzt als neiste Wierk de Skulpturewee.
D’Skulpturewee verbënnt Konscht an Natur a bitt de Visiteuren op verschiddene Plazen an der Gemeng aussergewéinlech kënschtleresch Entdeckungen. Mat senger oppener, kreesfërmeger Form léisst „Transformation“ ëmmer nees nei Perspektiven op d’Landschaft zou a regt dozou un, iwwer Verännerung, Entwécklung an d’Relatioun tëscht Mënsch a Natur nozedenken.
E grousse Merci geet un de Markus Hoffmann, un d’Equipe vun AKTIKULTI, un d’Membere vun der Jury an un all déi Persounen, déi bei der Aweiung dobäi waren.
Bei Ärem nächste Spadséiergang kënnt Dir dës um Site „Op der Berk“ um Mirador entdecken.
Den nächsten Opruff u Kënschtler·inne fir eng nei Editioun vum Skulpturewee Concours ass fir d’Fréijoer 2027 geplangt.
Fotoe vun der Inauguratioun
